Fame Deli @ 紅磡 ( 20-MAR-2024 )

紐西蘭草飼肉眼 250g ($118)

咁睇好大塊   但其實真係好大塊

今次乾咗啲   但就係我最鍾意嘅口感   同埋我仲未接受到 5 成熟呀

香煎美國自然豬梅肉扒 (招牌) ($98)

食兩份扒真係好飽好飽   所以今次又係將半份豬扒同意粉比里奧大人做聽日嘅 Lunch Box

南瓜湯

牛角包  

伯爵茶雪糕 & 咖啡雪糕   里奧大人話點解份量差咁遠嘅 ?!   但其實佢唔講   我都唔覺   哈哈

( 20-MAR-2024  WED )

尋晚個人都熱熱哋咁瞓   所以我都好驚瞓得唔好   雖然開 Dry 都夠凍   但內熱有排散   哈哈哈哈 ~

鬧鐘響咗都要抖 3 分鐘先起身   咁我刷完牙   里奧大人話尋晚瞓得唔好要晏啲番工   我都諗住瞓到 8 點 10 分先起身   但最後都係 7 點 40 分起身 lu ~

咁我換衫啦   里奧大人無啦啦問我係咪 Cafe 食早餐 ?!   我話唔係呀   我覺得佢係想陪我食   之後問番佢   佢真係話想陪我食呀   可能覺得應承咗我唔陪我   覺得好衰咁   哈哈 ~

今朝去茶記食早餐   佢哋見到我嚟都好出奇   我話依家多數喺屋企食早餐嘛 ~

我張八達通好煩   有啲地方好難嘟   因為佢哋部機好慢   今朝又係咁   不過我就要即刻拎張八達通出嚟嘟   最緊要比錢嘛   之後茶記阿哥話嘟唔到唔緊要   請我食都得   真係好好人呀   哈哈 ~

食完好精神喎   勁想周圍行街唔想番工   哈哈 ~

菇場忙下停下   咁樣時間就快過喇 ~

Lunch Time 出去行下先去食皮蛋艇仔粥   杰到好似食爛飯   唔通加咗皮蛋 ?!   不過我又無咩所謂   無咁多水唔駛咁脹胃 ~

越搞越杰   哈哈哈哈

行陣再去買菜同蕃薯   之後再經過商場   我一路行一路望下啲衫   有個職員叫我入去睇下男裝   之後我望一望啦   佢話有男女裝可以睇睇   真係好奇怪   點解頭先叫我睇男裝嘅 ?!   我點睇都係一個女人嚟嘛   哈哈 ~

阿怪真係好恐怖   大聲唱住歌入嚟   但又聽唔到佢唱嘅歌詞㗎喎   原來阿花都聽到   所以 Whatsapp 話我知佢唱歌   我話唔係第一次啦 ~

唔忙就繼續 Whatsapp  所以話咁快又傾到 3 點   呵呵 ~

放工即走   今晚同里奧大人出去食   食完就要番教會喇 ~

完畢之後有小食會   一路食一路傾偈都唔錯 ~

姊妹整嘅碗仔翅   真係好好味呀   初初諗住會剩番半煲   但估唔到食哂   因為個個都話好味道呀

咖哩魚蛋豬皮蘿蔔魷魚   始終擺咗一段時間   但都覺得好味   佢哋好多都覺得辣   但我同另外兩個同工又唔覺得辣   之後問我食譚仔係幾辣 ?!   我話小辣   佢話咁即係代表我食得好辣   上次阿花又係咁講

番到屋企都 10 點   但我都照開機洗衫   唔想成日記住要洗呀 ~

搞掂哂沖涼   里奧大人笑住話我點都要開機洗衫先安落   哈哈 ~

同佢傾番頭先活動嘅嘢   一傾就傾到 12 點呀   要即刻瞓啦   但其實只係有少少眼瞓 ~