糖醋排骨拚生炒骨飯 + 豉椒炒豬頸肉拚西檸雞飯 (外賣) @ 屋企 ( 6-MAR-2024 )

糖醋排骨拚生炒骨飯 - 生炒骨係炸到脆卜卜   糖醋骨就無食到   可以留番聽晚食

豉椒炒豬頸肉拚西檸雞飯 - 呢兩個餸嘅味道都 OK 呀

( 6-MAR-2024  WED )

尋晚感覺係熟睡狀態   之後去廁所   好似醒醒哋咁呀   不過天未光就繼續瞓啦   正想起身嘅時候   鬧鐘啱啱響   感恩感恩 ~

同里奧大人出去食早餐   我話呢排都想比自己休息下呢 ~

等食早餐嘅時候   里奧大人話我件衫熨得唔好   因為啲袋唔係貼住件衫   話肯定係我自己熨   之後我話呢排係你熨衫喎   佢就話件衫肯定熨咗好耐   哈哈哈哈   佢係都唔認   不過里奧大人熨衫真係熨得好直   我有時都係求其熨㗎咋 ~

食完早餐係好精神   同喺屋企食係唔同   里奧大人話無壓力   但焗麵包都好簡單啦   不過我都承認有啲啲壓力嘅   始終要要煲水又要預熱焗爐   其實我已經慢動作㗎喇 ~ 

菇場忙下停下   之後又做下自己嘢 ~

Lunch Time 出去行陣   去 7-11 買埋午餐就番菇場食喇 ~

唔忙就抖下喇   因為無啦啦有啲頭暈   尋日就腳仔軟   其實都唔開心囉   之前身體都唔錯家嘛   呢大半年又差番   唉 ~

放工即走   今晚去睇中醫   估唔到好多人睇   怪唔得阿齋話呢排好多人病   佢睇西醫都多人到要攝位睇呀 ~

醫師話我身體仍然好弱   我話我好似作感   因為頭暈同埋間唔中打嘖嚏   佢突然好大反應話千奇唔好病   仲要佢明明打緊 Keyboard 但用兩隻手做唔要嘅手勢   嚇到我即刻問點解 ?!   佢話我已經無電   如果病埋就更加無電   又問我今日駛唔駛病假   佢可能以為我一陣要番工   之後再話   妳唔舒服一定要請病假休息呀 ~

我睇完都差唔多 7 點   里奧大人啱啱放工   咁我話買兩餸飯番屋企食喇 ~

食完飯就同里奧大人去睇餐廳資料   咁我話唔帶銀包   但佢話要帶   因為我成日會明明話去餐廳睇下   之後就會周圍行下買下嘢咁   哈哈 ~

睇完資料就真係想行下呀   所以里奧大人就笑囉   話估到我係咁 ~

行完就番屋企沖涼   之後休息休息 ~

里奧大人話 "餐餐有宋家" 好笑   所以依家會錄比我睇   咁睇完笑下都好嘛   哈哈 ~

再睇陣 Youtube   今晚 10 點半都瞓覺 lu ~