麻婆豆腐 + 臘腸炒甜豆 ( 16-JUL-2024 )

( 16-JUL-2024  TUE )

感恩一覺瞓天光呀   因為想醒嘅時候係鬧鐘響 ~

早餐仍然食迷你牛角酥   今朝沖掛耳咖啡   完全無咖啡味嘅   我只係落咗好少好少煉奶   變咗好似奶茶色咁   哈哈 ~

菇場忙咗陣又抖下   但突然好眼瞓   所以即沖番杯齋啡   飲咗兩啖就精神番啲喇 ~

Lunch Time 出去食墨魚丸米線   因為豬潤未番貨呀   今次啲墨魚丸無咁好食了 ~

唔忙就 Skype   成日以為今日係星期三   咁家姐幫我訂貨要星期三先有得拎   我同家姐講話今晚去拎貨   佢話今日星期二喎   好在同佢講咋   唔係我真係今晚去拎呀   哈哈 ~

連續打咗 7 個噴嚏   最後頂唔順着番件外套   我已經飲熱嘢   但都覺得好鬼凍呀 ~

放工同阿花一齊行   佢同船頭係 Frd 所以唔同阿爽 Frd   因為佢哋反咗面   之後阿花都話呢度係同事永遠都係同事   我話想同佢做多 10 年同事   佢話想中六合彩唔想做同事   話中咗六合彩會帶我去見車銀優   我話想去愛寶樂園睇熊貓多啲呀   笑到佢死   仲係咁打我 ~

番到屋企即預備晚餐   但差唔多 6 點 50 分開餐呢 ~

是日晚餐 - 麻婆豆腐 + 臘腸炒甜豆

麻婆豆腐 - 本身諗住就咁豬肉碎   但最後都特登去買盒硬豆腐   咁先似麻婆豆腐嘛   依家有呢啲現成醬就最好   同埋屋企多數有免治豬肉做儲備   隨時煮呢個餸都得 ~

臘腸炒甜豆 - 我鍾意食甜豆   爽爽脆脆好鬼正   不過里奧大人就麻麻哋 ~

食完就食榴槤蕃薯   其實係口感似榴槤   我初初以為係榴槤味嘅蕃薯呀   哈哈 ~

我鍾意細細隻嘅蕃薯   因為唔駛焗咁耐嘛

洗埋碗就開機洗衫   之後沖涼休息   里奧大人就熨衫~

睇下 Youtube 又打下機   里奧大人 10 點瞓   我就 10 點半先瞓 ~