Milu Thai @ 尖沙咀 ( 20-JUL-2024 )

泰式鳳爪沙律 ($88) - 呢個味道唔錯

小食拚盤 ($188) - 我最鍾意食嘅係蝦片

泰式串燒 (半打 $108) - 一般啦

芒果梳打 /荔枝梳打 / 菠蘿梳打 / 柚子梳打 - 以 $34 來講都算係貴   因為完全係無味道

@ 大食代

麻辣蓮藕 ($26) / 麻辣雞翼尖 ($35) / 涼拌豬耳 ($45) - 本身叫中辣   職員話重慶辣好辣   叫我哋小辣   但我覺得唔係咁辣

芒果糯米飯 ($58) - 里奧大人話要食呢個

芒果沙冰 / 荔枝沙冰 / 百香果沙冰 X 2 - 特價 $20 咋   但如果原價係 $38 就唔抵飲啦   因為只係化學味加冰

     

 ( 20-JUL-2024  SAT )

感恩一覺瞓天光   6 點 40 分可以起身添呀   沖埋涼洗完頭仲可以抖下先去搭車 ~

差唔多落車見到家姐同 Berry   咁落車就慢慢行啦   之後又見到家姐   打比佢叫佢哋等埋我先一齊番屋企呀 ~

我一路行   見到 Berry 停低再望實我   咁我行埋去嘅時候   佢大聲叫同撲我呀   無諗過喺街都咁熱情   工人話 Berry 見到太太唔會咁   家姐話得喇   佢係都要加埋呢句先開心   哈哈   咁開門又唔入去   要等埋我先入   呢啲動作真係冧死我啦 ~

咁等埋家姐沖涼先去食早餐   我拎住手袋走   家姐話唔好拎啦   我話要帶銀包呀   佢話帶咩呀   佢帶咪得囉 ~

Berry 心諗   做乜咁早就嚟煩我呀   哈哈 

之後我話要買咖啡   明明之前特價 $10 但無哂   要買 $16.5 囉   家姐話佢一比錢就要買貴嘅   哈哈   飲茶又要家姐比紙巾   我話唔帶手袋   真係乜都假手於人   家姐就話唔帶袋唔好咩 ?!   唔駛拎嘢不知幾好 ~

荔灣艇仔粥 - 我話想食粥   估唔到咁大碗同埋有魚片

鴛鴦燒賣皇

豬潤睇粉 - 姐夫話食嘛   之後家姐叫我食   我話唔呀   尋日已經食咗好多嚿豬潤呀   咁再比張相佢睇   佢都話真係好多豬潤囉

迷你珍珠雞

醬皇蒸鳳爪 - 家姐問姐夫同我食唔食 ?!   我哋話唔食   佢都照叫   因為我哋之前成日都叫嚟食   哈哈

木魚燒茄子 - 我以為齋係茄子   原來有埋魚肉

飲完茶諗住番屋企   但家姐話去 360 買嘢   之後我又買呀   仲話唔駛錢買嘢真係超級爽   呵呵 ~

我離遠見到桃 $88   我同家姐講話咁多個 $88 好抵呀   即行埋去睇啦   真係諗住買㗎喇   但原來係 $88/2 個   所以家姐叫我唔駛講嘢   哈哈 ~

咁再去睇無花果   見到咁大粒仲只係 $79/盒   所以家姐話每人買一盒   我話當然好啦   又唔係我比錢   之後仲問我買唔買榴槤 ?!   我話玩咩   點拎番屋企呀 ~

買咗好多嘢   好在家姐有拎環保袋 ~

我又有一袋嘢拎走   唔記得家姐比咩我   我叫佢攝落環保袋啦   之後話我個環保袋咁細   我話唔係細   係正常 Size   只係妳買咁多嘢比我   所以裝到滿滿咁啫 ~

見到 $30/2 包真係超級抵   咁家姐話買呀   我以為佢鍾意食   原來係買比工人嘅朋友   因為聽日佢番印尼

搞掂就陪 Berry 女啦   咁我餵佢食零食   我慣咗逐啲逐啲伸入比佢食   點知突然間隻手指好痛呀   原來比佢咬到我流血   不過唔關佢事嘅 ~

下次就咁成條比佢食算喇   哈哈

咁樣好似好細隻咁   但其實佢都唔算大隻嘅

合埋眼好得意

影完呢張就再餵零食比佢   點知就出事   最搞笑梳化啲皮甩咗落地下   我以為係血呀   好奇怪我明明按實無滴出來嘛

家姐勁驚呀   問我駛唔駛去醫院 ?!   我話唔駛   上次都比較剪剪到洗血啦   只係上次傷口係長   今次傷口係深   哈哈 ~

我叫家姐比啲冰我敷住個傷口   佢話無冰   再比咗個放入冰袋嘅嘢比我   之後敷咗好似 2 分鐘就無流血   家姐就即幫我噴藥水膠布   之後話搽消毒傷口嘅藥膏同膠布   但話噴藥水膠布搽唔到藥膏添   叫我去洗咗啲膠布喎   真係比佢笑死   次序錯哂都有嘅 ~

之後係咁問有無流血 ?!   我話無啦   妳都睇到   又話我個咀唇白哂嘅   係咪頭先流得太多血 ?!   我話真係誇張 ~

我話今晚出去食飯呀   家姐係都要工人幫我捲頭髮   但我話一陣番到屋企都會再沖涼洗頭   佢話唔洗頭咪得囉   我話頭都出汗家嘛   點唔洗喎   除非一陣無流汗   涼都唔駛沖添 ~

搞掂就到家姐捲頭髮   工人無啦啦話里奧大人唔比太太嚟屋企   因為 Berry 咬我老婆   呢句好笑呀   同埋佢啲語氣又好搞笑   所以我覺得佢講嘢係好搞笑   但一定要家姐翻譯   哈哈 ~

我同家姐講話依家食緊祛濕輕   佢話我個肚腩細咗   不過我又唔覺喎 ~

我捲緊頭髮   Berry 坐喺我前面陪我咁   幾咁乖呀

到家姐捲髮都仍然坐喺度陪住家姐

成日望住個窗   因為就嚟落雨

叫下佢   佢又望下妳咁

工人打家姐大脾   Berry 吠工人   之後工人打我大脾   Berry "胡胡" 聲再吠工人   我話 Berry 真係乖女   工人碌住對眼望住 Berry 話乖女 ?!   咁又係   佢保護我就乖啫   吠工人就唔係咁講法   哈哈 ~

同家姐係咁傾偈   完全唔記得 Berry 女喺梳化底添   不過佢呢排好鬼衰   成日唔出嚟陪我 ~

我走先伸個頭出嚟

我同家姐講話 Berry 好肉酸   佢都答係   仲叫我 Delete 張相   哈哈

1 點鬆啲走人   今日家姐送我搭車   之後先同 Berry 行街 ~

里奧大人 1 點 40 分 Send 張午餐相比我睇   我以為佢整鬼我   因為講咗去食下午茶   點知原來佢真係到咗茶記   我話 Whatsapp 話下午茶嘛   佢仲答我 OK 添   不過我又唔會話佢   因為佢知我鍾意去呢間茶記食嘢   一次早啲去攞位呢 ~

我去到見成碟飯喺度   我即刻話做咩唔食先呀   佢話等埋我先食   我話下次唔好等我喇   肚餓就要食先啦   真係睇見都心痛 ~

食完就番上屋企放低嘢就出去搞啲嘢   差唔多 4 點先番到屋企 ~

頭先一入茶記   3 個阿姐都話盒無花果好靚   有個阿姐直頭入嚟問我喺邊度買?!

家姐之前喺 7-11 買咗薯片比我   咁有次我叫佢買支檸檬飲品   佢無啦啦又比支我   佢應該以為我鍾意飲啦   其實我好多時覺得筍價就叫佢買家嘛   最搞嘢係比 2 罐鮑魚   我覺得好有福袋 Feel 呀   哈哈

糟糟喺日本買比家姐嘅   家姐上次話比我   我話唔要喇   咁頭先諗住買果醬   家姐叫我唔好買   比呢樽我   

里奧大人鍾意食呢啲脆脆麵零食   我話家姐買㗎   哈哈   因為真係家姐比錢   朱古力又係好味㗎   幾年前家姐去韓國買過   當時要成 $70/包   依家好似 $39 咋

又要沖涼洗頭啦   所以頭先捲到靚一靚係無用   哈哈哈哈 ~

家姐又問隻手指點樣 ?!   我話真係無事呀   頭先里奧大人再幫我再搽藥膏同膠布   真係無再流血呀 ~

抖到 5 點鬆啲就坐巴士去尖沙咀   但原來改道呀   咁都無問題   去到尖沙咀就得㗎喇 ~

5 點 40 分見到前面撞車   好在司機比我哋落車咋 ~

最搞笑里奧大人以為地址係星光行   仲話一落車就到   但其實我哋係去天星大廈囉 ~

真係好奇怪喎   我明明 Check 咗個地址係我婦檢附近   我係識去嘅   但點解無比里奧大人睇嘅 ?!   我估應該佢成日話係碼頭   我就無咗件事 ~

最終我哋好似 6 點 20 分先到餐廳   好在阿 mi 喂兩個到咗先咋   因為我 Book 咗 6 點   留枱只係得 5 分鐘 ~

我頭先問阿 mi 佢哋去到邊 ?!   佢以為我哋到咗   所以佢到餐廳就同職員講話 Book 咗 6 點   職員叫佢哋自己入去搵   但唔見我哋又出番去   只見 2 個男人   之後再同職員講話未有人到喎   職員先講話兩張枱 Book 咗 6 點都係姓里   又會咁啱嘅   哈哈 ~

行咗成半個鐘先去到   我同里奧大人行到成身濕哂   真係要抖陣先可以叫嘢食呀 ~

食下傾下   我對住阿 mi 傾偈嘛   但間餐廳越嚟越嘈   如埋阿 mi 佢哋後面嗰 2 張最特別嘈   我直頭聽唔到里奧大人同阿喂傾咩   所以坐唔夠一個鐘就轉場喇 ~

我哋唔係太飽但又唔想再食正餐   諗住出太子   但又唔知到時有無位   所以阿 mi 話去大食代睇下   估唔到個場無咩人   但係好似 8 點幾就開始多人囉   所以 9 點幾都徹退喇 ~

因為唔知仲係咪改道   所以我哋都搭地鐵番屋企喇   又可以同埋阿 mi 佢哋一齊行去地鐵站   中途聽到阿喂講話 xx 呀 xx 呀   之後原來話係阿 mi 個細姨呢 ~

番到屋企即沖涼   頭先行咗 10 分鐘都已經流哂大汗喇 ~

今晚 11 點 20 分先瞓   沖完涼個身係好難先灘凍   所以點都唔會即刻瞓㗎   哈哈 ~