豆豉鯪魚炒苦瓜 + 蕃茄薯仔南瓜粟米湯 ( 29-JUL-2024 )

尋晚食剩嘅滷水鵝

( 29-JUL-2024  MON )

今朝瞓到 7 點 07 分醒咗   但係 7 點 22 分先起身 ~

反正早咗起身   咁就煲薑茶啦   之前買咗啲薑就唔好嘥呢 ~

早餐食焦糖咖啡朱古力生方包   估唔到好好味呀   口感仲有啲煙煙韌韌   我最鍾意   哈哈 ~

我買水樽嘅時候   話一定要買個袋套住   之後里奧大人即刻幫我搵    所以就買咗呢個喇   我好鍾意呀

靈俢 25 分鐘就番工   家姐平時一買麵包比我   就會 Whatsapp 問好唔好食 ?!   今朝見佢 8 點幾都未問   我就 Whatsapp 整鬼佢   問佢覺得啲包好唔好食 ?!   佢話咁講即係唔好食囉   我都知佢實以為覺得唔好食㗎   哈哈   次次反問番佢   佢實覺得我唔鍾意食同唔好食咁   好鬼搞笑 ~

要認證比里奧大人睇   哈哈   

菇場忙呀   忙到 11 點先搞掂 ~

Lunch Time 出去食水餃上海麵   食完去買粟米同南瓜 ~

買完就落好大雨   咁去超市睇下嘢啦   見到 NON GMO 粟米粒   $12.5/2 罐好抵   諗住買 2 罐   最後忍唔住買咗 4 罐   原來買 4 罐有 9 折呀   望住部自助機喺度笑   慳咗 $2.5 呀   感覺抵上抵   哈哈 ~

喺超市等咗陣先無咁大雨   同埋已經 12 點 40 分   要即番菇場喇 ~

唔太忙就 Skype   咁先似番工   哈哈哈哈 ~

放工即走   番到屋企即預備晚餐   今晚要 7 點先可以開飯呀 ~

是日晚餐 - 豆豉鯪魚炒苦瓜 + 蕃茄薯仔南瓜粟米湯

豆豉鯪魚炒苦瓜 - 將苦瓜用鹽醃   不過我係淥熟啲苦瓜先炒   如果炒到熟呢   隻手會好攰   頭先將苦瓜切薄片   我隻手都有少少攰   里奧大人話炒苦瓜都好味   我話好似無油麥菜咁油 ~

蕃茄薯仔南瓜粟米湯 - 尋日唔記得買粟米同南瓜   覺得個湯好似好寡咁   所以今晚再加粟米南瓜   味道真係好好多㗎 ~

洗埋碗就開機洗衫   之後沖涼喇   里奧大人就熨衫 ~

里奧大人倒咗杯龍眼水出嚟   佢叫我食埋啲龍眼肉   我話都無味啦   里奧大人話有味㗎   我話我杯無食到添   之後我問點解之前你話啲龍眼肉無味唔食   但今次又話有味呢 ?!   佢話今朝見有熱水   所以加幾粒龍眼肉落去   我都覺得奇怪啦   今朝我將啲龍眼肉切開一半家嘛   不過有啲兩粒黐埋一齊   我仲以為咁啱剪唔到   所以咁完整一粒添 ~

之後一齊睇張家朗   依家覺得花劍都幾好睇   睇完就睇 Youtube   10 點 20 分再睇   睇到 10 點 45 分呀   今次就好緊張喇   但唔記得幾點係金牌賽   但我一定睇唔到啦   哈哈 ~

糟糟之前送嘅朱古力蝴蝶酥   好好味呀

今晚 11 點先瞓呀   算係夜㗎喇 ~