咖哩吉列魚柳飯 (外賣) + 炸雞 ( 8-JUL-2024 )

( 8-JUL-2024  MON )

尋晚去咗一次廁所   感恩好快瞓得番 ~

星期一多數瞓多 10 分鐘   難得自己他他條條食早餐嘛 ~

早餐食椰絲包   呢個包都算大個 ~

菇場忙咗陣就可以抖下   咁都好   星期一唔係咁想郁 ~

Lunch Time 出去買菜同龍眼   買完已經 12 點 15 分   不過我唔想食麵同麵包   所以買兩餸飯番菇場食呀   阿齋同肥仔豪話我好少食兩餸飯   我話唔想食到出汗   因為已經一身汗哈哈 ~

生炒骨唔夠脆   但個汁好味道   炸雞膇都幾入味   好在我要少飯   因為真係好多肉呀   最搞笑係阿齋同船頭話我食咁多肉嘅 ?!   我話出街好少食菜   因為仲油過啲肉囉

唔忙就做自己嘢同 Skype 啦   今日由 2 點半到 5 點半整其中一組冷氣   但係都有啲焗 ~

放工即走   番到屋企即預備晚餐   雖然只係焗嘢   但都要 7 點先開餐 ~

是日晚餐 - 咖哩吉列魚柳飯 (外賣) + 炸雞

咖哩吉列魚柳飯 (外賣) - 里奧大人今日同水姑食午餐   佢食剩半條吉列魚柳同飯   咁今晚要食啦   蘑菇飯又要再留番聽晚先可以食了 ~

炸雞 - 將 2 件做手撕雞肉比里奧大人做 Lunch Box   但都食剩 2 件   咁留番聽晚食啦 ~

洗完碗就燜餸   里奧大人今日幫手開機洗衫同熨衫   我可以舒舒服服去沖涼   哈哈 ~

我買咗龍眼   咁啱水姑又買咗好多生果比我哋   仲喺澳洲買咗 2 件 ADIDAS 短袖 Tee 比里奧大人   里奧大人話其實好唔想要啦   佢最驚大大隻牌子   我即刻諗起阿花話似鄉下佬   不過佢都會照着嘅   因為質地都好舒服   同埋最緊要係黑色   紅色就應該比番水姑㗎喇

睇下 Youtube   今晚 10 點 20 分瞓覺 lu ~