蕃茄肉碎意粉 + 辣椒蒜蓉炒小白菜 ( 17-JUL-2024 )

( 17-JUL-2024  WED )

尋晚瞓到半夜有啲熱   應該係食車厘子關係啦   幾次都係咁   咁去完廁所都即瞓番   但唔知幾點又醒醒哋咁   同埋感覺到個人唔係咁舒服   起身嗰下其實想請病假   但抖咗陣又無咩嘢   咁就起身喇 ~

今朝出去食早餐   食完就去里奧大人公司坐陣先番工 ~

依家仍然戒備狀態   所以要早啲番菇場 ~

菇場唔忙就做自己嘢喇   咁樣時間快過好多 ~

Lunch Time 出去食水餃米   食完再去買龍眼   上次買咗但比哂里奧大人食呀   所以今次再買比自己食   之後再買包榴槤蕃薯就走喇   條街好鬼熱呀 ~

番到菇場又係成身汗   好在依家冷氣夠   唔係都幾辛苦   不過其實太凍又好容易攝親   哈哈 ~

唔忙就做自己嘢   依家戒備狀態   唔係咁方便成日上網 ~

放工即走   一落到樓下就狂風大雨   所以等咗一陣先行   不過行到一半路反遮呀   成條裙濕哂咁滯   好在着深色咋   唔係真係肉鬼酸 ~

之後行入商場   感覺係凍到想嘔   第一次有咁嘅感覺 ~

番到屋企即換衫呀   里奧大人要幫我去 HKTV Mall 拎嘢   咁我就唔駛再去拎呢 ~

我星期六買咗 4 Pack ($25.80)   家姐星期二話 HKTV Mall $90 有 4 Pack   即係 $22.5/Pack   所以佢即幫我買   之後叫我再買夠 $200 就送貨   話不如買多 4 Pack 奶茶   我話唔呀   之後買包小王子麵都只係 $122   佢再叫我買其他嘢買夠 $80   不過我真係無嘢想買喎   同埋為咗送貨格硬買多 $80 又唔想囉   最緊要間店唔係遠嘛   仲近過我平時去超市買嘢   咁自己拎都無問題啦

今晚差唔多 6 點 45 分先開飯   呢排煮嘢比較慢 ~

是日晚餐 - 蕃茄肉碎意粉 + 辣椒蒜蓉炒小白菜

蕃茄肉碎意粉 - 用現成嘅醬料包就最方便   真係懶人首選   今日特登買咗個洋蔥   但煮完先記得佢嘅存在   真係激鬼死 ~

辣椒蒜蓉炒小白菜 - 之前買咗樽辣椒蒜蓉   依家間唔中都用嚟炒菜   真係好味好多㗎 ~

洗埋碗就開機洗衫   之後沖涼休息 ~

里奧大人都鍾意食榴槤蕃薯

口感都好綿

打下機又睇陣福寶   今晚 10 點半即瞓 ~