沙爹王 XO 辣椒醬炒墨魚卷 + 辣椒蒜蓉炒芥蘭苗 ( 12-JUL-2024 )

( 12-JUL-2024  FRI )

尋晚去咗 2 次廁所   之後里奧大人又半夜搵張被仔   又整自己張被   但動作又大喎   我感覺到好似地震咁呀   所以今朝起身即話佢呀 ~

早餐食甜餐包搽醬占   里奧大人講咗幾次話等佢搽   我就夾芝士   因為我成日話搽醬占要啲時間   又要洗多樣嘢   哈哈   不過其實我都會搽嘅   等得佢嚟不如我整埋   但都算佢啦   有記住我講嘅嘢   我真係成日講話最憎洗嘢㗎   哈哈 ~

食完就靈修 15 分鐘   雖然時間唔多   但都想 Keep 住靈修   因為自己實在太懶~

菇場忙下停下   又行嚟移去   所以 11 點開始有啲餓 ~

Lunch Time 一到即飛去買米線   其實番到菇場都 12 點 10 分   咁都好   雖然餓但又唔想 12 點前食   哈哈 ~

食到 12 點 40 分   之後開始有啲眼瞓   但繼續睇 Youtube 啦   最後都頂唔順由 12 點 50 分瞓到 1 點 05 分   咁我同家姐講話食完即瞓   佢話以為我做咩咁眼瞓   哈哈   我話味道重呀   次次食都係咁 ~

仍然忙下停下   咁做完 Excel 就眼濛濛   家姐問我屆點打 ?!   我話 SU 6   佢即串串共話: 小姐   我問妳個屆字點打   唔係問個屈字點打   我聽完都忍唔住笑出來   哈哈 ~

之後我想打話: 唔好掛住睇個下午茶   但語音出咗唔係唔好話佢睇過下午茶   咁我無睇寫咩就 Send 出去   家姐問唔好話邊個睇下午茶 ?!   我先知自己原來咁寫   所以佢有時話睇咗好耐   真係唔明先問妳   哈哈哈哈 ~

忙完又 Skype   今日時間過得超級快呀 ~

放工即走啦  阿花問我有無帶風扇 ?!   我話有啦   仲帶埋太平眼鏡添   但一帶就落雨   笑死佢 ~

番到屋企即預備晚餐   今晚里奧大人又係 6 點半先番到屋企   不過仍要等多陣先可以開餐呢 ~

是日晚餐 - 沙爹王 XO 辣椒醬炒墨魚卷 + 辣椒蒜蓉炒芥蘭苗

沙爹王 XO 辣椒醬炒墨魚卷 - 我覺得依家好難買到 3 色椒咁   咁買包水果椒試下   終於清埋支辣椒醬   以前會用完一樣嘢即買另一樣嘢填補空缺   依家唔會啦   食極唔完真係搵自己嚟搞 ~

辣椒蒜蓉炒芥蘭苗 - 淥完菜再加辣樣蒜蓉炒   真係好味好多   所以我覺得里奧大人其實都幾慘   我煮嘅嘢又唔係話好好食   菜就永遠只係淥   好在佢都好包容   大家都開心   唔係就大家無得食    哈哈哈哈 ~

洗埋碗就去買嘢比樹葉老婆   買完就即番屋企沖涼   今晚唔做運動喇   真係食完碗米線之後攰到夜晚 ~

Chateraise 法式輕多士禮盒 12 件裝 ($120)   我依家幾鍾意喺呢間店買禮盒   價錢唔算貴   同埋包裝都幾靚

今晚又送一個泡芙   開心開心   因為一個要 $13 㗎

里奧大人就熨衫   我就睇 Youtube ~

呢盒香印提子都好脆好甜喎   下次會再買嚟食   依家天氣熱   想食啲多水份嘅生果 

睇下呢樣嗰樣   但最後都係睇 BAO Family 為完結   因為佢哋真係好得意   今晚諗住會 10 點唔夠就瞓   但估唔到 10 點半先瞓覺 ~