( 28-JUL-2024 SUN )
今朝同里奧大人一樣 7 點起身 不過我就係去家姐屋企嘅 ~
我有時 Whatsapp 用手寫嘅 所以見差唔多字型就按㗎喇 其實唔係家姐咁講 我都唔知自己打錯咁多 無計啦 我又眼濛濛 兩面雨差唔多字型 哈哈哈哈
家姐問我想食咩 ?! 我話唔食粥 姐夫就唔食糯米雞 最搞笑係佢問想食咩 但我哋答唔想食咩 哈哈 因為正常係想食嘅嘢係多過唔想食嘅 ~
落車嘅時候無雨 咁繼續行啦 見到前面係落緊雨 但我行緊嗰邊就無雨 真係覺得好神奇呀 諗住影 Video 比家姐睇 但啲雨開始向我邊落喇 所以拿拿聲開遮呀 我真係第一次見咁情況咋 ~
煎蘿蔔糕都幾好味
上次叫哂點心先見到子薑叉燒酥 我話下次要食 所以都知家姐今次實會叫
春卷
家姐一定要我哋食嘅鳳爪 哈哈
牛肉腸都好多牛肉
我最鍾意食嘅干蒸牛肉
食完就同家姐行超市 因為要買罐裝咖啡 只係 $6/罐咋 所以再買 4 支 因為家姐之前幫我買咗 4 支呢 ~
一入屋 Berry 女突然好熱情咁撲我 起碼 20 秒都有 比佢撲完先放低個袋同換拖鞋 搞到次序調轉哂 哈哈 ~
Berry 女尋日沖完涼 所以啲毛好滑 我係咁摸係咁索 之後煩到佢成日要走 哈哈 ~
我特登對住 Berry 講 唔好又咬到我到流血呀 家姐真係好快擰轉身話: 佢上次無咬妳 哈哈
食咗好耐咁 但餵佢食就好快食完
男人樣咁 哈哈
之後又食哂啲狗糧
今日 Berry 要食杜蟲藥 家姐負責拎藥丸放入芝士粒 工人就負責包好粒芝士粒 工人就話去洗手先 抹完手就出嚟諗住餵 Berry 食杜蟲藥 家姐就拎張紙巾比佢再話: 小姐 妳抹乾隻手先啦 工人話抹咗但唔係咁乾 呢句好笑呀 哈哈 ~
知道要食藥 所以好緊張
好尖嘅牙仔
食哂就乖喇
餵佢食藥辛苦過自己食藥 哈哈
要將芝士粒 "質" 入佢個口先得㗎
工人今日出旺角 咁啱今日地鐵好似唔停旺角站定咩 咁家姐教佢點搭地鐵啦 仲叫佢出到旺角打比家姐 咁佢到咗旺角就打比家姐 仲教番家姐點行先搞笑 之後又問家姐飲唔飲珍珠奶茶 ?! 不過家姐都唔飲 lu 因為一陣都要出去 ~
同家姐傾偈啦 糟糟咁啱又打比家姐 佢又好奇怪我又喺家姐屋企 ?! 家姐就話我今日唔駛去教會幫手 所以嚟探 Berry 囉 ~
家姐話佢上星期都整親右手嘅食指呀 又係係咁滴血 又會咁啱嘅 ~
跟住我哋入房 咁就乖喇 以前姐夫唔比啲狗仔跳上床㗎 依家 Berry 點瞓張床都得呀 所以我都覺得姐夫都錫 Berry 嘅 同埋教得好過家姐 哈哈
12 點唔夠就同家姐去買麵包 職員答佢 12 點半先有 之後佢同我睇其他嘢 好在我聽到另一個職員問佢係咪要咋 ?! 咁我哋唔駛周圍行嘛 ~
家姐順便買埋麥包比肥仔 之後佢拎條麵包拎到好似好重咁 咁我幫佢拎啦 原來真係好重 ~
家姐話佢好鍾意買嘢 就算自己唔食都想買 好似薯片咁 買咗比我同工人 我話我咪一樣 食完 Lunch 周圍行就硬係買啲嘢 我包餅乾下個月就到期啦 成日買完又唔想食先擺咁耐 之後我話我哋應該有囤積症 上次睇電視講話不斷重覆買嘢 咁我哋應該唔嚴重嘅 因為只係買嘢 唔係通街執嘢 哈哈 ~
焦糖咖啡朱古力生方包 ($60/條)
職員分開 2 袋裝 咁就方便喇 我哋唔駛自己分
家姐比一半比我 另一半就同佢同事 Share 食 上星期佢已經話買嚟 Share 食㗎喇 但我哋又唔記得 所以今朝佢講咗幾次話一定要買㗎喇
傾多一陣偈就同 Berry 落街 順便送埋我去搭車 但行到一半又好似想落雨咁 所以叫佢哋番屋企先呀 我等多 7 分鐘就有車 唔駛陪我 ~
成日望住出面 因為想落雨呀
同里奧大人去食下午茶 去街市買菜同去樓上買雞上脾肉 今日又係芒果條試食 不過我唔排隊食 lu ~
番到屋企即沖涼洗頭 抖陣就滾蕃茄薯仔湯 咁聽晚就有湯飲 ~
特選寧夏枸杞 ($37) / 原色茯苓粒 ($16) / 美國特選原味核桃仁 ($27) 我覺得樓上買嘅嘢唔貴 同埋質量都唔錯
里奧大人 4 點幾番到屋企 一入屋就話好香咖啡味 我話我煲緊湯只聞到蕃茄味咋噃 之後佢行埋去餐枱嗰邊 話係啲麵包好香咖啡味呀 ~
今晚大家唔太餓 所以今晚 7 點先開餐 ~
是日晚餐 - 燒排骨 (外賣) + 滷水鵝 (外賣)
燒排骨 (外賣) - 經過見到幾靚 估唔到又幾好味喎 里奧大人今次勁喇 話出面好少有燒排骨賣 我話你又知道係燒排骨咁勁嘅 因為平時佢食咩都唔知咁㗎 同埋我話佢今日食下午茶話叉燒無富華咁好食 所以特登再買比你食囉 呵呵 ~
滷水鵝 (外賣) - 呢盒只係 $25 咋 但我覺得咁嘅份量都唔錯 因為食咗 2 件咋 哈哈哈哈 又要留番聽晚添 ~
洗埋碗就沖涼 之後等埋里奧大人沖涼同熨衫 佢抖陣就一齊網上散拜 之後再睇陣 Youtube 同奧運 不過我就 10 點半瞓 里奧大人就繼續睇 ~
沒有留言:
發佈留言