蠔油燜雞膇鵝掌 + 油麥菜苗 ( 9-JUL-2024 )

( 9-JUL-2024  TUE )

尋晚去完廁所都好快瞓得番   但係天未光就醒醒哋   呢下就比較難瞓番   所以鬧鐘響咗 3 分鐘後就起身 ~

里奧大人又係瞓得唔係咁好   我話應該連續食 2 餐炸雞啦 ~

好在早餐出去食   因為我需要飲杯極提神咖啡   哈哈 ~

菇場唔忙   不過好焗囉   好在 11 點左右整番好冷氣   唔係真係焗暈 ~

Lunch Time 出去食水餃上海麵   食完再行陣   去埋 360 買脆脆就番菇場喇 ~

我同阿齋講之前買 2 包係 $60   依家加到 $62 呀   激鬼死   佢話兩蚊啫   我話每次買都加兩蚊就死啦   之得上次買多幾包啦   佢話我黐鬼線   要加就加㗎啦   妳咪買咁多包呀

西瓜上工廠   所以下午 3D ~

溫總話阿爽校冷氣校到 15 度   真係神經病   唔怪之得成日壞冷氣   成日又着兩件衫   唔熱先奇啦 ~

放工買雞骨草比里奧大人   之後又搞肚痛咁   所以叫里奧大人買麵包   我要即番屋企呀 ~

見里奧大人買咗 3 個芝麻包番嚟   我問佢做咩買 3 個 ?!   佢話有折   我話頭先我講咗話買 2 個就得囉   咁佢話平時我買 3 個   我話另一間買係買 2 送 1   咁咪有 3 個囉 ~

之後我話點會買 3 個㗎   一係就 4 個   之後佢好驚咁   靜靜哋食咗大半個   咁我又要話佢啦   就嚟食飯做咩食包呀 ?!   佢好慘咁話妳話聽朝太多麵包食唔到   我依家食啲先囉 ~

真係唔知好嬲定好笑   不過我一路整嘢嘅時候   我都覺得頭先依依哦哦好鬼煩   下次自己買唔到就出去食算喇 ~

今晚終於清哂啲蘑菇飯同炸雞   睇嚟要隔一排先敢再食炸雞喇 ~

是日晚餐 - 蠔油燜雞膇鵝掌 + 油麥菜苗

蠔油燜雞膇鵝掌 - 突然好想係鵝掌   所以整嚟食   今次個汁好杰呀   我其實鍾意咁   不過唔係成日都整到呢 ~

油麥菜苗 - 諗起以前唔識買半斤菜㗎   以為一買就要買 1 斤   同埋街市啲人又好鬼惡   我都唔敢問囉 ~   

洗埋碗就開機洗衫   之後沖涼休息 lu ~

睇下 Youtube 又打下機   今晚 10 點 15 分都瞓覺喇 ~