樂林小鍋米線 @ 鰂魚涌 ( 9-DEC-2013 )

春卷豬大腸小鍋米線 ( 中辣 ) - 唔酸唔辣   仲諗住開開胃胃   最慘係 d 肉碎有蝦米味   好似好稀嘅擔擔麵醬咁   搞到個湯底變咗好漏 ~   

豬軟骨蟹籽丸小鍋米線 ( 大辣 ) - 個辣汁有蝦米味   勁唔鍾意   因為我唔 expect 酸辣湯底係咁囉  

( 9-DEC-2013  MON )


尋晚勁熱呀   所以瞓得唔係咁好   我仲以為得我自己熱添   好在里奧大人都覺熱   佢覺得熱就係熱架喇   因為佢平時夏天開冷氣都着抓毛褸   而我覺得凍就係凍   如果我話凍要着褸呢   我屋企人同佢第一句會講話天氣真係凍   哈   因為我好小會話凍呢 ~   


早餐食芝腿治烘底   umm   好掛住 Marriott 嘅魚蛋湯米呀 ~

番到菇場忙咗陣   諗住 load 相   點知勁多嘢做    做到 lunch time 都未做完   不過唔理啦   食飯要緊嘛   好在有 lunch box   可以慢慢食呢 ~ 
   

忙忙忙   真係忙到放工   不過都仲未做完   woo ~


今晚去鰂魚涌睇中醫   家姐喺中醫度幫我排隊   但都要等咗陣先有得睇呢 ~


醫師仲話我個肚脹卜卜成肚風   話個人虛喎   咁我依家都好聽話啦   肯燉肉汁 ~


差唔多 6 點 45 分就搞掂   我超級餓呀   又想食濕嘢   所以去樂林食酸辣米線   唉   我食過呢間 3 次   每食一次都比機會佢   不過今次真係完全唔掂   湯底唔酸唔辣都算   個湯唔夠熱先死囉   之後同家姐講   原來佢個湯都唔夠熱   下次真係唔再幫襯佢 lu ~


食到超級飽   最慘係有 d 反胃   咁又見到架 606 走咗   所以家姐話行去北角坐 619 ~


去萬寧買 super sour sugar   連食幾粒真係舒服好多   起碼無哂反胃感覺   家姐沿途又係咁講依間好食果間好食   我叫佢唔好講   我咩都唔想食   之後又行去阿信屋睇嘢   雙眼離不開食   哈 ~


感恩去到有 619 呀   所以好快可以番到屋企   可以快 d 煲中藥同開機洗衫   今晚好攰   所以搞掂哂就沖涼   唔熨衫住喇 ~


里奧大人 8 點幾先放工   我叫佢買唐記牛肉飯番屋企食   因為我想快 d 見到佢呀 ~


今晚里奧大人刷完牙之後   無啦啦話哎呀   我問佢咩事   佢話想食芒果布甸   點知走咗去刷牙   咁我話食完再刷囉   想做就做   之後佢話要學佢阿 head 咁要及時行樂   我話不嬲都要咁想法啦   做人都開心 d   我好怕 d 人係咁儲錢儲錢儲錢   錢唔係唔儲   不過都要比自己適當嘅享樂家嘛 ~