黑胡椒扎肉 + 香草牛油粟米 ( 17-DEC-2013 )

( 17-DEC-2013  TUE )


尋晚換咗張羽絨被瞓覺   瞓瞓下覺得有 d 熱   所以瞓得唔係咁好添 ~


勁餓呀   所以早餐食奄列餐 ~

菇場唔忙喇   可以做下自己嘢 ~


不過 4 點又黎忙   好在 1 個鐘頭搞掂哂咋 ~


放工本來想去街市買菜   不過最後都無去   因為好鬼凍   想快 d 番屋企 ~


咁去咗超市睇下有無菜   但都唔靚嘅   咁番屋企喇 ~


第一時間煲藥   之後就抖陣   差唔多 7 點先煮嘢   今晚自己食先   所以就食米粉喇 ~


咁我開爐蒸嘢嘛   之後我入去廁所嘅時候   已經聞到燶味   心諗無理由係我廚房發出黎   因為我有足夠嘅水蒸五香肉丁家嘛   點知唔夠 1 分鐘   走入廚房睇一睇啦   嘩   嚇瓜我呀   原來爐邊嘅錫紙板同銀色紙板燒着咗呀   我比自己冷靜 2 秒鐘   就即刻熄咗個爐先   之後淋水 ~


仲以為搞掂之際   原來隻窗嘅仲有錫紙板不斷燒呀   嚇死我啦   又即大盤水淋熄佢呀   嘩   超級勁驚呀   成間屋一陣燶味   仲要係煙霧離漫   咁即刻開哂 d 窗同抽氣扇   但 5 分鐘之後仲好大煙   點知原來我無開抽氣扇   好在開番之後   好快無哂 d 煙咋   驚魂甫定就收拾殘局啦   之前一心想清潔埋爐底   依家真係咩都清潔埋啦   搞咗 1 個鐘   終於搞掂哂   感恩感恩 ~


之後執到好攰嘛   咁 feel 到自己對腳震哂   心諗都唔駛仲咁驚喇啩   點知原本自己挨咗喺洗衣機隔離   所以咪震囉   豬豬 ~


鬆番一口氣就煮米粉食 lu   里奧大人又咁啱打黎話放工   咁我食完抖陣   沖埋涼就等佢番黎喇 ~    


是日懶餐 - 黑胡椒扎肉 + 香草牛油粟米


黑胡椒扎肉 - 里奧大人鍾意薄切   明明 1 條切 5 刀要變咗切 10 刀   煩 ~  


香草牛油粟米 - 又開罐頭粟米喇   本來就咁開黎食   不過見煎完 d 扎肉仲有油剩咗   所以加 d 香草一切炒   變咗熱食   唔錯唔錯 ~


煮麵比里奧大人嘅時候   望到隻窗原來裂開哂   勁驚   咁等里奧大人食完嘢先講佢知   好驚佢鬧呀   哈哈 ~   


佢好認真睇啦   之後話隻窗係穿咗幾個窿呀   嘩   我即刻 call 鋁窗師傅呀   感恩師傅聽日 2 點半可以黎整   感恩感恩 ~    


咁抹碗嘅時候   聽到 "裂裂" 兩聲   勁驚隻跌落街呀   好在無事咋 ~


明明諗住今晚煮完飯就睇下雜誌 relax 一下   不過比頭先咁嚇一嚇   真係咩 mood 都無哂 ~


點知搞下呢樣   搞下果樣   差唔多 11 點 45 分先瞓 ~