麥芽糖焗雞翼 + Sambal 辣吞拿魚炒飯 + 素翅粟米蛋花湯 ( 23-jul-2012 )

下次都係唔好咁懶   唔用片糖做糖水   冰糖水賣相唔掂呀   嘩哈哈

( 23-jul-2012 mon )

星期一喇   3 號風球   好在無乜雨   唔係就煩啦   感恩感恩 ~

早餐食餐蛋治   食咗一半已經好飽   所以留番一半 lunch 食 ~

菇場靜呀   有 d 想瞓添呀   所以覺得好耐先等到 lunch time ~

食完餐蛋治就上網睇嘢   好快又開工啦   又即係有排先等到放工 ~

上網睇到天文台話黃昏前後考慮改發 8 號風球   之後就話 5 點前後會考慮改發 8 號風球   又話打唔成   無啦啦吹歪咗   所以要改掛 8 號   差唔多 3 點半左右   Admin 就 msn 通知大家 4 點半可以收工   咁即係好快掛 8 號啦 ~

我諗住有咩車就上   但去到車站明明有車   我都無上   之後幾架都爆   等咗 10 分鐘先有車   oh no ~

諗住去惠康無咩人買嘢   其實真係唔多人行   不過原來都要排隊等比錢   番到屋企都 5 點半 lu ~

打比里奧大人問佢走未   佢就邪啦   明明今朝喺香港   不過番到 office 就有 urgent 嘢比大陸   所以順便喺大陸 office 做嘢   咁所以佢地要等香港 HR 通知先可以走   都痴鬼線   好多公司都放人走啦   5 點半未放人   仲要喺大陸喎   真係離哂大譜 ~

之後我 5 點 50 分開電視   原來 5 點 40 分已經掛咗 8 號   即打比里奧大人   叫佢即番屋企呀   佢話 HR 都仲未有人通知   不過佢都照走   無車番屋企點算先 ~

本來想就咁炒飯同粟米湯   不過見有時間   所以都整埋雞翼喇 ~  

里奧大人 8 點番到屋企   好感恩可以車程順利仲有位坐   同埋無落雨   仍都好感恩今晚可以同佢一齊食飯呀   因為真係無咩幾何呢 ~

是日晚餐 - 麥芽糖焗雞翼 + Sambal 辣吞拿魚炒飯 + 素翅粟米蛋花湯 + 芝麻湯丸

麥芽糖焗雞翼 - 好有心機焗架   好開心里奧大人可以即時食   佢好鍾意食   話好好味   所以我都好開心   因為佢食嘢好鬼麻煩嘛 ~ 

Sambal 辣吞拿魚炒飯 - 前晚叫外賣剩咗碗白飯   所以炒飯最好   好在同時間都煲好飯   因為一罐 Sambal 吞拿魚用黎炒一碗飯   係醬多過飯   所以要加多大半碗飯一齊炒先得呀   但都用剩 1/3 醬   留番聽日再炒先 ~

素翅粟米蛋花湯 - 無買菜   就會出現粟米湯   正呀 ~ 

芝麻湯丸 - 無啦啦好想食   所以即淥呀   利川湯丸算唔錯架喇   但覺得以前 d 皮就煙韌 d   不過算啦   唔駛自己搓有得食已經好好呢 ~

沖完涼就 Line   又睇下電視咁   睇到天文台將會考慮發更高信號   呢個 "韋森特" 風力都好驚人呀   真係唔好講笑   我坐喺屋企都覺得間屋 d 窗會比佢扯走   同埋我覺得 d 風聲好恐怖呀   好似鬼叫咁 ~

11 點 20 分改發 9 號風球   woo   犀利呀   短時間咁大改變   聽日應該唔駛番工啩 ~