煎鯪魚餅 + 通菜 + Sambal 辣吞拿魚崧子炒飯 ( 24-jul-2012 )

( 24-jul-2012 tue )

瞓得勁差呀   d 風聲雨聲超嘈   真係好似無瞓過咁 ~

7 點 25 分鬧鐘響   即開電視   都仲係 8 號風球   即係可能放半日   所以繼續瞓   之後媽咪 8 點幾打黎話 10 點前後會改發 3 號風球   咁即係要番工啦   不過仍然可以瞓多個幾鐘   其實瞓得都唔好架   因為始終未知確實時間落波   咁瞓好有壓力架 ~

10 點起身   再認真睇新聞   原來 00:45 改發 10 號颶風訊號呀   之後 3:45 am 再改發 8 號風球   呢個風真係超級勁呀  之後 10 點 10 分改發 3 號 lu   要 2 個鐘頭內回到菇場   所以即梳洗再出發食早餐喇 ~

今次明明話個風打唔成   估唔到突然吹歪咗   即改發 8 號風球   又令到我諗番起自己出發去吉隆坡果日   諗住打到正一正   後尾個 8 號風球掛咗幾個鐘就落波   令我當下切實感到神嘅保守帶領呢   感恩感恩 ~

食完番上屋企即沖涼就出門口 lu   好感恩啱啱有車   所以差唔多 12 點就番到菇場喇 ~

11 點幾食完早餐   12 點半根本食唔落 lunch   所以 lunch time 落去買杯珍珠奶茶   有嘢咬下   都應該可以頂到放工呢 ~

放工即走喇   去街市買餸   估唔到無豬肉買喎   好在魚檔有開   即轉去買鯪魚肉呀 ~

番到屋企預備晚餐   之後開機洗衫   抖陣就煮飯 lu   今晚自己食先   食完就沖涼再熨衫   好攰呀 ~

里奧大人 8 點收工   8 點 45 分番到屋企   食完就睇下電視   今晚居然唔駛做公司嘢   實在太好喇 ~

是日晚餐 - 煎鯪魚餅 + 通菜 + Sambal 辣吞拿魚菘子炒飯

煎鯪魚餅 - 買咗半斤鯪魚肉 ( $14 )   買完之後見到有人買 $7   丫   我以為最小買半斤添   我食鯪魚餅最鍾意點泰式甜辣醬一齊食   所以煎鯪魚餅都幾方便 ~

通菜 - 本來想炒架   不過又煎魚飯又炒飯   所以改為灼   其實係因為懶   點腐乳醬食算數 ~

Sambal 辣吞拿魚菘子炒飯 - 加咗菘子   口感又唔同哂   正呀 ~