蒜頭豆豉蒸排骨 + 蠔油芥蘭 + 蕃茄薯仔瘦肉湯 ( 28-DEC-2014 )

( 28-DEC-2014  SUN )

今朝同里奧大人瞓到差唔多 11 點   鬧鐘完全無響過   里奧大人都唔知係咪 set 錯咗嘢   咁都番唔切教會   所以約媽咪同家姐 12 點飲茶呢 ~

媽咪話食呢碟飯嘅   咁家姐黎到見到   話咁多人   做咩唔叫炒嘢食   咁媽咪就話 "咪係囉   碟飯係阿妹叫"   嘩   我即刻發哂顛咁鬧媽咪呀   話妳叫就妳叫啦   做咩話我叫   我最憎人咁屈我   家姐都話媽咪又係衰嘅   自己叫咪自己叫囉   又唔會話妳   里奧大人就話媽咪做咩講大話呢   第時無人信妳   不過最後我都同媽咪講對唔住   因為覺得咁惡鬧媽咪真係唔啱呢

家姐喺一田買嘅士多啤梨   話好甜喎   所以特登拎比我地食呢 

我地依家全部用三叔   Note 4 影相真係唔錯    

飲到 2 點   今次又係畫鬼腳   我輸咗   呵 ~

我地各自歸家   我就自己去買餸   里奧大人就番屋企做公司嘢喇 ~

3 點鐘無啦啦好鬼眼瞓   頂唔順入房瞓   平時會喺梳化瞓架   因為出過街嘛   但真係好鬼凍   所以真係要入房瞓   入到被竇都要郁幾郁   個身先暖呀 ~

瞓到 4 點   勁精神呀   之後滾湯   搞掂哂就熨衫   好鬼凍呀   唔郁唔得囉 ~   

7 點準時食飯   實在太好喇   早 d 食早 d 徑步 ~   

是日懶餐 - 蒜頭豆豉蒸排骨 + 蠔油芥蘭 + 蕃茄薯仔瘦肉湯

蒜頭豆豉蒸排骨 - 次次整呢個餸   都覺得自己超級懶   但我想徑步嘛   唔想煎嘢囉   今晚里奧大人居然爬飯   佢似乎好鍾意食呢個餸咁喎 ~        

蠔油芥蘭 - 唉   灼得太耐喇   無哂口感 ~  

蕃茄薯仔瘦肉湯 - 我休養嘅時候買咗幾嚿瘦肉   諗住燉肉汁   但媽咪成日煲湯比我飲   所以 d 瘦肉到依家先食咋   今個星期媽咪無煲湯   所以我先可以滾湯咋   但仲有 1 嚿瘦肉喺冰格   真係要快 d 清埋佢先得 ~ 

搞掂哂就抖陣   8 點 15 分出發去徑步喇   woo   勁凍囉   急步徑咗 2 個圈   對手先唔凍咋 ~        
徑徑下見到教友同牧師   仲以為自己眼花添   哈哈 ~

番到屋企即沖涼喇   之後食生果   睇電視睇到 11 點幾   係時候瞓喇 ~