螞蟻上樹 + 芥蘭炒臘腸 ( 30-DEC-2014 )

( 30-DEC-2014  TUE )

依家天氣凍   真係要懶床先起身   之後沖咗熱水涼都覺凍呀   woo ~

唔太餓   所以食奶油多   不過今朝有 d 攰   要飲咖啡   但我其實只係飲 1/3 杯   飲哂會覺得好反胃   依家飲熱奶茶咖啡   都會係小奶   同埋我一定唔會加糖   家姐話好苦喎   不過我飲咗咁年都慣哂   呵 ~

菇場唔忙   同 8 卦睇有咩好團   但無咩好團囉 ~

Lunch 出去食   行下阿信屋   又比我見到家姐鍾意食嘅蟹柳   原價 $10   依家 $7 仲有 8 折   超勁抵啦   打比家姐   家姐以為我睇錯   咁我問咗 staff 先話佢知家嘛   唔信我都有嘅   衰 ~

財散人安樂   次次出街都買嘢咁唔掂   但唔帶銀包又好無安全感喎 ~

諗住 hea 過   2 點幾無啦啦超級忙呀   真係要開行 turbo 做   因為如果聽日放 4 點   做唔哂就唔係咁好啦   不過放工都未做完架   但聽日應該半日就搞掂   所以放工都走 lu   同埋今日所有大粒都唔喺度   唔準時走對唔住自己呀   哈 ~

去完街市買餸    搞掂哂就去換喇叭   番到屋企抖陣就煮飯喇 ~   

呢幾晚都係 9 點幾飲咗一細杯芝麻粉沖水   但半夜三更就會熱醒   唔知關唔關事呢   所以我今晚都係番到屋企即飲好 d   如果半夜都係熱   即係唔關事啦   咁要開哂 d 窗先得喇   哈 ~  

7 點半煮完   自己食先 lu   想去徑步嘛   咁里奧大人 7 點 50 分先放工   咁等埋佢先一齊徑步囉 ~   

是日晚餐 - 螞蟻上樹 + 芥蘭炒臘腸 

螞蟻上樹 - 浸咗 1 包仔粉絲   好似唔夠咁   咁浸多包啦   反正想清哂去   點知整嘅時候就覺得勁勁勁多   好後悔呀   因為今晚同 lunch box 都要食好多   嗚 ~

芥蘭炒臘腸 - 前晚買 2 斤芥蘭   只煮咗 1 斤   咁今晚要清埋果 1 斤啦   灼完再加臘腸炒炒炒   好鬼攰囉   下次都係唔好兩個餸都係炒喇 ~  

洗埋哂碗   抖到 9 點半就去徑步喇   今晚如果里奧大人唔去徑步   我都照去   因為今晚煮多咗飯   我足足食咗兩碗   衰里奧大人食果小小就話唔食   咁我 lunch box 已經成碗飯   加埋大量粉絲   無位"質"囉   咁唯有我食埋佢啦   慘   嗚嗚嗚 ~

徑咗半個鐘   番到屋企即沖涼喇   之後睇陣電視   11 點幾瞓 lu ~