涼瓜肉鬆腐竹 + 漁莊海鮮炒飯 (外賣) @ 屋企 ( 8-JUL-2018 )

( 8-JUL-2018  SUN )

今朝 9 點 50 分自然醒喇   估唔到里奧大人已經沖埋涼搞掂哂添   咁可以慢慢嘆早餐   之後就番教會喇 ~          





今次講到基督內嘅平安   係上帝應許比我哋嘅   唔會咁易受外界影響   好似比里奧大人聽咁呀   我成日同佢講   神有最好嘅安排   最緊要在當中學習忍耐同順服呢 ~

崇拜完畢就同水姑飲茶   佢上星期買咗 2 罐曲奇比我哋   因為無防腐劑   所以想我哋快啲食呀 ~

其實同里奧大人都唔餓   所以食咗啲點心就算   咁水姑叫咗幾碟嘢   最後佢自己打包拎走 ~

呢個幾好味   所以另外叫多碟



傾下食下又 2 點   水姑話以為我哋去曼谷一日就番香港   救命   佢居然唔知邊度係曼谷呀 ~

因為食夠 $500 可以用 $100 Coupon   但又無嘢想食   所以最後我哋叫咗 1 個炒飯 + 1 個小菜   留番今晚食 ~

食完就搭車去牛頭角街市   咁里奧大人陪我   我可以買定多啲嘢   咁我買完西瓜同菜心   里奧大人就問我仲有咩嘢買 ?!   我話咁樣就係比壓力我囉   我要慢慢行去睇嘛   所以我叫佢去超市等我   咁無咁熱   佢又話唔好   之後企喺門口等我囉   我自己再入街市買   再買瓜菜同生果   買買埋埋又幾袋 lu   講真   平時都係咁買法   但今次里奧大人幫手拎   真係舒服好多啦   如果自己拎   放低哂嘢之後就手震震囉   哈哈 ~

番到屋企擺好哂啲嘢就開機洗衫   之後 Un-pack 嘢啦   真係最花時間囉   用咗 2 個鐘先搞掂   攰到隻嘢咁 ~

咁叫家姐嚟拎手信   最搞笑佢以為我啱啱瞓醒   話我去完旅行應該好攰   唔會出街喎   但其實我已經做咗好多嘢啦   哈哈 ~

不過佢感冒   我都唔比佢嚟啦    揸車危險嘛   咁睇下邊日再嚟拎囉 ~

咁次次去旅行   我都好少帶信用卡   因為里奧大人會帶嘛   咁我放咗喺櫃桶   但搵極都無   不過我肯定喺放喺屋企囉   之後再叫里奧大人幫我搵一次   佢叫我唔駛驚   唔會唔見喎 ~

之後佢突然間好驚咁話 : 唔通我頭先剪咗妳張信用卡 ?!   之後再睇佢個 Card Holder   佢張舊卡真係仍然喺度囉   即係真係剪爛咗我嗰張啦   嗚嗚 ~

但佢真係好奇怪囉   我擺嘅位置同佢唔同   加上我將 6 張信用卡再加 Coupon 同立雜嘢擺埋一齊   佢無理由會零零舍舍拎起嗰張卡家嘛   真係救命 ~

6 點幾都煮嘢喇   早食早休息   反正炒熱翻啲嘢就搞掂 ~

洗埋碗就大清潔廁所   之後沖涼 ~

抖陣就熨衫   去旅行洗哂啲新衫   咁再加上本身帶去嗰啲   熨咗起碼 40 件衫褲   之後頂唔順話好攰   里奧大人就熨埋剩番嘅十幾件衫 ~

11 點幾都瞓喇   聽日番工   但又唔係咁眼瞓添 ~