粟米炒豚肉 + 蠔油芥蘭 ( 26-JUL-2018 )

( 26-JUL-2018  THU )

尋晚半夜發惡夢呀   好記得個夢係阿 mi 用間尺指住邊啲方向有鬼   之後就指住我間房   咁我瞓喺床度嘛   之後我張被開始被拉開   所以大叫啦   咁最恐怖係隻鬼已經喺我膊頭郁緊   我完全係真實 Feel 到咁喎   所以叫得更加大聲啦   但原來係里奧大人拍醒我   佢比我嚇親呀   話聽見我好大聲叫呀   佢帶咗耳塞都聽到呀   不過我都聽到自己好大聲叫呢   哈哈 ~

咁驚完一輪又瞓番   點知再發鬼夢   個夢係老闆生日   半夜三更所有同事去酒樓同佢慶祝   好記得個牌仲寫住 "大老闆生日快樂"   咁食完飯就送大陸同事搭 Lift   咁應該 7 樓停   但 4 樓開咗門   有隻幾鬼入咗嚟   之後唔記得點樣佢哋又走咗   咁好喇   之後到 8 卦老婆同個女鬼上身   變咗男人聲   仲叫我唔好講比 8 卦知   勁驚囉   唉   尋晚好似無瞓過咁 ~

今日里奧大人有嘢要搞   所以早咗起身   咁叫佢陪我食早餐呢 ~





菇場忙下停下   但我想抖下   哈哈 ~

Lunch Time 出去行陣   再買嘢食番菇場慢慢食 ~



仍然忙下停下   所以都好快放工了 ~

番到屋企即預備   里奧大人差唔多 6 點半番到嚟   但 7 點先有得食呢 ~

是日懶餐 - 粟米炒豚肉  + 蠔油芥蘭

粟米炒豚肉 - 呢個餸幾好味㗎   鹹鹹甜甜咁   最衰我加咗 1 條香腸   係德國舅父買比我哋   但太重肉味   好難頂 ~

蠔油芥蘭 - 買過幾次芥蘭   硬係有幾條係苦咁   唔鬼再買喇   其實我好鍾意食芥蘭㗎 ~

洗埋碗就拖地   沖埋涼就再開機洗衫   比里奧大人激死   床邊有件底衫又無洗   咁我再揭開張被又有件底衫   所以我話怪不得你日日開機洗衫   啲衫洗極都有咁   嘥水嘥電嘥時間 ~        

今晚都攰   所以 11 點都瞓喇 ~