客家好棧 @ 九龍灣 ( 11-NOV-2015 )

南乳粗齋煲

栗子炆雞煲

客家煎釀豆腐 - d 豆腐只係暖   咁唔掂啦 @@

砵仔蒸飯

( 11-NOV-2015 WED )

成日以為今日係星期四   因為里奧大人次次都係星期三上大陸家嘛   點知尋日上大陸   搞到我覺得今個星期多咗一日要番工咁   哈哈 ~

天陰陰咁噃   但又唔太凍   最緊要唔好落雨就得喇 ~

今朝早餐等咗好耐   原來係漏單   最搞笑係阿姐以為我食完   因為我次次食完先睇報紙   佢見我得番杯嘢飲又睇緊報紙   所以唔為意囉   哈 ~

菇場唔太忙   又係做埋 d 手尾咁啦 ~

見有 d 陽光   所以出去行   順便食埋牛肉粥   食完去 759 買蟹柳比家姐   之後番菇場 lu ~

今日公價有 8折   原價 $7/條 折咗 $5.6/條   所以買 16 條比家姐慢慢嘆



嘩   今日 d 時間過得好快   好似眨眼就放工咁   實在太好喇 ~

今晚約咗大姑奶食飯   咁我尋晚同媽咪講   話今晚可能又黎睇妳   點知媽咪今朝打黎問我係咪今晚去睇佢   佢好似好開心咁   所以我都去睇下佢啦   反正唔駛煮飯   呵呵 ~

我今晚一定要買廁紙呀   所以喺媽咪屋企附近超市買囉   叫埋工人黎幫手拎   之後佢同我講話今朝媽咪肯做運動   佢同工人話行一個大圈   工人唔彩佢   佢就話行 2 個圈   咁工人就話好喇   之後同媽咪講話兩個太太好擔心妳呀   妳要做多 d 運動   唔好令太太擔心   仲問媽咪記唔記得佢有糖尿病嘅時候   每朝早同晏晝都做兩個鐘頭運動架   所以最後糖尿病正常番哂囉   工人咪話囉   要做運動要郁架   我真係每次都會多謝工人佢咁為媽咪   佢就話唔駛客氣   好搞笑 ~

講真   我真係由 6 月開始就瞓得唔好   每晚半夜醒咗   就會諗起媽咪唔做運動   我就會好鬼激氣   之後好難先瞓得着   好記得我最好瞓係同里奧大人去大陸果兩日   瞓得好林   完全係放鬆咁瞓   真係好難得囉 ~

番到屋企   工人係都要媽咪自己拎住 stick 自己行呀   媽咪真係好聽佢話   哈哈   所以我即拍低比里奧大人睇   我話呢晚我係全年最開心呢 ~

$67.8/2條再送 1 pack 4 罐忌廉   所以買夠 8 條   

之後媽咪同工人食飯   我就唔食 lu   咁飲埋杯人參果汁   抖到 7 點 15 分就去客家好棧喇 ~ 

大姑奶之前做唔知咩眼手術   所以里奧大人就約佢一齊食飯   不過酒樓好鬼嘈啦   食完傾多陣就走喇   實在太嘈喇 ~

如果同大姑奶一齊行   我習慣會拖住佢隻手一齊行   之後佢如果要用兩隻手做動作呢   做完之後又好自然拖番住我   即刻諗起大食表妹話佢唔會拖人地隻手   同埋佢最驚人地繞住佢隻手   佢會彈開呢   哈哈 ~      

里奧大人仲腳痛   所以唔徑步   但話可以坐喺公園陪我   嘩   咪搞啦   變態佬咁昅住哂   哈哈   所以我話我都唔徑啦   番屋企熨衫算喇 ~

沖埋涼就熨衫   咁就要開冷氣喇   唔想熨到出汗   熨完抖陣就熄冷氣   都係自然風舒服 d ~

呢排里奧大人要做公司 d 新嘢   所以我多數自己睇電視   又煲番 "急診男女"   其實睇咗幾十次   但係揀黎睇   哈哈   所以里奧大人一聽到韓文就話 "好恐怖"   佢仲勁   就咁聽都記得劇情呀   唔知以為佢真係識聽韓文   哈哈 ~

但最勁係我   因為以為自己睇哂 21 集   但其實第 13同 14 集根本無睇到   呵   所以里奧大人話我真係痴線   點解同一集同一部份可以睇幾十次   唔悶咩 ?!   佢話佢都識背添喇   嘩哈哈哈哈 ~

里奧大人做到 11 點就休息喇   睇埋新聞   11 點幾就瞓喇 ~