濛濛濛 ♡ 黃山 5 天豪華團。美好回憶記錄 ( NOV 2015 )

今次去黃山都好開心   因為終於同 CC 兩公婆一齊去旅行呀 ~

其實今年新年去張家界嘅時候   聽導遊話黃山好靚   都決定年底去黃山架喇   咁問 CC 有無興趣   估唔到佢有   咁就一齊去啦   但一定要跟團   第一唔會有爭拗   我唔想去完旅行就無咗個老友   第二我唔會自由行去大陸   因為安全好多   同埋係點到點   方便好多呢 ~

咁本來一早講話年底去嘛   不過媽咪 6 月身體唔好   所以里奧大人提醒我   話同 CC 講年底唔去黃山   因為佢又係要清假   唔好 hold 住人地嘛 ~

好感恩媽咪之後身體好番好多   所以即同 CC 講話年底可以去黃山呢 ~

我同里奧大人負責睇行程同時間   如果大家都啱時間就一齊   唔啱就下年去   因為我講咗話去黃山一定要我地四個一齊去   哈哈 ~

好感恩 11 月 17 日有個豪華團出發   係慶祝康泰 50 年嘅   所以做緊特價 $3599 ( 未計其他雜費 )   因為我地 4 個都唔想 12 月請假   咁 11 月有團就最好   我又唔駛撞正女人嘢   所以一政決定報呢個團喇 ~

呢個團嘅行程其實唔太辛苦   因為前後山分兩日行   有個 4 日團係一次行哂   咁就辛苦喇   所以寧願貴啲都唔揀 4 日團   大佬   行山呀   我知仲要上樓梯最多   我一定唔行得快   唔想為咗去個旅行而咁辛苦呢 ~

今次團友有 29 人呀   我覺得好多呀   可能對上一次去越南得 14 人啦   哈哈 ~

因為 29 人咁多   所以好難記得邊個打邊個   印象中有 10 對夫婦 ( 加埋我同 CC )  + 1 對父子 +  5 個單身 ( 4 男 1 女 )   其餘 2 個真係完全無印象添   定我聽錯呢 ?!

今次當然坐大巴啦   好似係 39 個座位   所以實夠坐   兔兔最勁   放背囊喺隔離位   所以就益埋我地可以放背囊   呵 ~~~~~~~~~~

@ 黃山   雖然大霧   睇唔到日落日出   但我都覺得值得去呢   但一定唔好揀旺季   因為太多人行真係會好危險   啲人唔會理妳家嘛   總知阻住佢行就會推開妳   真係碌落山都似

@ 宏村   我覺得好靚   但可惜太趕   好多都係 Snapshot   如果可以逗留兩個鐘就好啦   可以慢慢影

天氣方面 - 日日都灰灰暗暗   不過我又無話唔開心喎   因為我出發前兩星期睇黃山天氣   都講明落雨   我覺得最緊要唔好落雨就得架喇   因為啲路會好跣   危險好多架 ~

食物方面 - 估唔到都 ok 喎   因為我知道山上物資短缺   食飽已經好好啦   但最驚喜係樣樣都夠熱   始終團餐嘛   同埋地方又凍   上次喺張家界   真係餐餐啲餸都唔熱架   所以有啲陰影   哈哈 ~

住宿方面 - 都 ok 嘅   喺大陸住酒店   就算話 5 星級   妳都唔好有咁大期望呢   我覺得乾淨就好心滿意足架喇 ~~~~

兩岸國際大酒店 @ 杭州

團友方面   今次太多人   真係唔係個個認我哂   但自己果枱團友就實記得嘅   哈哈   同埋都幾好傾嘅   只係白頭佬兩公婆成日食嘢唔執輸咁啫 ~

呢次旅程   我覺得去得黃山   就預咗辛苦架喇   其一我可能真係驚得滯   因為我出發前睇黃山啲blog   有個阿伯被人推跌咗落山   咁睇啲路又好似好窄好斜咁   我畏高家嘛   但我因為報咗名先知黃山係行呢啲地方   所以點都要行啦 ~

但其實啲路真係一啲都唔難行   只係我個人覺得上樓梯比較辛苦   同埋我唔知係咪高山症定咩   成日頭重重同胃脹脹   所以我喺山上食咗好小嘢咋   完全唔似平時嘅我   我其實直頭可以唔食添呀   真係無胃口   不過上山要有氣力   所以我先食啲啲咋   連零食都唔想食呀   所以里奧大人都知我辛苦   我嘢都唔食喎   仲唔驚 ?!

去黃山最深刻印象   當然係個天成日濛查查係咁行行行啦   另一樣就係挑夫   見到佢地咁辛苦   賺嘅錢又唔多   真係好心痛   所以我覺得真係要好好珍惜自己所擁有嘅每一樣嘢   幸福唔係必自然呢 ~

今次同 CC 兩公婆去旅行都夾到   佢地都好照顧我呀   加埋里奧大人又好照顧我   我覺得呢次旅行   真係感覺到好多人錫我呢   感恩感恩 ~~~~

CC 最搞笑   次次見食物上枱就叫我快啲影相   一係就即轉黎比我影   之後佢先食嘢呢   哈哈 ~

睇黎下次去旅行可以多個伴喇   不過一定要跟團囉   始終講緊嘅係 4 個人嘅唔同習慣嘛   唔想大家就黎就去搞到唔開心囉   同埋佢仍然好清楚咁講明   太凍嘅地方唔會去   太熱嘅地方又唔去囉   不過我覺得去太凍嘅地方玩都好辛苦   啲衫又厚   真係成喼都係衫   想買啲嘢真係要就住就住咁   同埋會唔願郁囉   呢下先慘嘛   哈哈 ~

團費 : HK$3,999 X 2
保險費 : HK$192 X 2
領隊導遊司機服務費 : HK$480 X 2
利是 :HK$200 & RMB50