濛濛濛 ♡ 黃山 5 天豪華團 Day 1 (PART 1/2) ( 17-NOV-2015 )

( 17-NOV-2015  TUE )

今朝 9 點起半即起身喇   沖涼洗頭   搞掂哂所有嘢   早餐都唔食   10 點 45 分出門口喇 ~

依家重係輕裝備   但其實個背囊都係裝零食多呢   哈哈   我真係好怕餓嘅感覺架

Call 咗的士 11 點到平台   咁我地又早咗落樓   咁打比佢   佢話塞緊車   可能要遲 5 分鐘   咁都無問題   我地 11 點 40 分去 J 區集合   可以叫 CC 兩公婆報到先呢 ~

陽光普照真開心   不過到黃山就應該唔會架喇   但唔緊要   去旅行嘛   點都係開心嘅

我地真係搭正 11 點 40 分到 J 區   去到已經見到 CC 兩公婆   我地 4 個人係 A 組   超易記   哈哈   同埋感覺我地係最早報名果幾個   哈哈   今次有 29 人呀   我聽到去到 P 組呀   有啲係
一個人去旅行   勁呀   因為我實唔夠膽呢 ~

今次揀咗黃山 5 天豪華團   搭中國東方航空   起程係11月17日嘅 2:10 pm   回程係11月21日嘅 11:30 pm ~

4 人 4 喼

4 條煙

我同里奧大人講話影 8 對腳   哈哈   無諗過我地全部都着黑褲

1117   對我黎講好有紀念性架   第一次同老友一齊去旅行呢

12 點 15 分 Check-out 喇   我勁餓呀   所以即離境   要去食嘢喇 ~

CC 佢地朝早已經飲咗茶   所以佢地 share 雞鵝飯   我同里奧大人就每人一份   因為我勁想食海南雞飯呢

1 點食完就去閘口喇   今次去 505   因為我地坐細機呢 ~

用罐頭疊嘅像

我地去 505 閘口

要坐接駁巴士去 505 閘口   職員叫我地行快啲呀   因為要開車喇   哈

坐咗 7 分鐘就落車喇

到喇

去到見到 503 閘口開咗   兔兔同我地講話 503 閘口開咗喎   我話咁又點呢 ?!?!   CC 話如果佢想去韓國咪去 503 閘口上機囉   呵 ~

我地排隊登機嘅時候   咁兩個地勤一路 check 機票一路傾計   到 check 到里奧大人張機票嘅時候   個地勤講咗句 "食咗飯未呀 ?!"   我果刻覺得依家啲地勤咁 nice 嘅   之後醒一醒   佢應該係問佢同事食咗飯未呀 ?!   我見里奧大人個樣係諗一諗   之後想答個地勤咁呀   好在最後佢無答人咋   哈哈   不過我接受唔到個地勤咁樣工作態度啦   掛住傾計求其 check 咁 ~

排隊上機了

今次坐中國東方   原定 2 點 10 分起飛   不過最後係 2 點 25 分先起飛囉 ~

我地坐細機   係三二   所以我地是但一個會坐隔離果行   我要坐 window seat   CC 話佢瞓覺   兔兔又會睇戲   所以係都要我同里奧大人一齊坐   衰奧話 " 自由時間好短暫"   嘩哈哈哈哈 ~

CC 知我影相   所以一定比我坐窗口位

頭先 O 仔都講咗   一 pair pair 嘅可能要分開坐   如果起飛之後見無人行過   咁兩個可以拖下手   有人行就放手咁   我覺得好搞笑呀   唔係痴纏得咁緊要呀嘛   哈哈 ~

原來細機係無得睇戲嘅   仲要連 Ipad 呢啲都唔準開添啊   咁好啦   可以瞓覺 ~

飛喇

3 點 15 分 high tea 時間到   勁想快啲開嚟睇下係咩來

原來係咁   第一次食香蕉咋  哈   咁我食埋個牛角酥   都 ok 啦   唔好有要求嘛   蛋糕就比埋里奧大人食   我最驚見到啲提子呢   咁我夜晚食埋個芝麻包   估唔到又幾好味喎

完全無食過   呵

坐飛機真係勁口渴   所以一定飲汽水   開心啲呢   因為我依家好小飲汽水啦

睇下行程

塊玻璃花成咁

里奧大人用手機影雲海   估唔到咁立體   好靚呀

但其實好鬼曬   哈哈

啱啱喺雲海出黎

到杭州喇

遲咗起飛當然遲到埗   本來 4 點 20 分到架   最終 4 點 55 分到杭州呢   不過都唔緊要   反正今晚係無行程   呵 ~

差唔多 5 點落機

咩都影   因為要做記錄   哈

5 點 03 分

行呀行

等緊行李   里奧大人成日話我掛住傾計   咩都唔理喎

一出機場都唔係好凍咋噃   好在里奧大人堅決兩手準備   唔係帶哂厚衫就慘喇   焗病呢   哈哈 ~

上旅遊巴喇   旅程正式開始   不過今晚係無行程嘅   哈哈

5 點半上車   當地導遊係飛哥   香港領隊係 O 仔   今次坐架車係 45 座位   所以我地呢團 29 人坐就絕對無問題啦   兔兔隔離位仲無人坐添   可以擺背囊   因為里奧大人重裝備好重呢   但我都唔弱架   應該都有 8-10 磅   已經無拎哂咁多零食架喇   都唔知點解咁重 @@

領隊同導遊開始介紹自己喇

今次調咗行程   係會杭州去上海返   所以今晚唔會入屯溪   因為要坐 3 個鐘頭車架   如果真係去屯溪   起碼 10 點先到酒店呢 ~

原來黃山本身有直航機   但只係 for 旅行團   不過係有時段嘅   一年得幾個月   同埋到 10 月就無架喇   因為打後就唔多人到黃山   凍丫嘛   航空公司都唔會做蝕本生意啦 ~

飛哥問我地呢團有無人有行山習慣   我地個個話無   佢勁愕然   話行黃山係全中國行山最辛苦之一   有 1 萬 7 千級樓梯   不停上上落落   所以佢地金句係 " 上山氣喘   下山腳軟   上山氣管炎   下山關節炎 "   哈   咪咁嚇人好喎   其實我上網都知行樓梯多   同埋我預自己一定係包尾   反而我最驚 d 人唔守秩序   咁天雨路滑   妳推我撞   真係好容易跌落山崖架   山崖呀大佬   我睇 blog 睇到話有人就係唔讓路   迫下迫下跌咗落山崖呀   好驚囉   所以我其實都有啲後悔去黃山   好似好危險咁 ~

佢仲話得罪老細先會帶團去黃山   哈   好多同事帶完黃山   要起碼休息一星期先可以再出團呀 ~~~~

咁飲食方面   佢話杭洲口味清淡   安徽口味就多油+鹹+辣   所以飛哥都話會叫食店小油小鹽小辣   但食店做唔做就一件事   咁都明嘅   佢地慣咗手勢嘛 ~

我又食下嘢   寫下筆記咁啦

火紅一片   都知係塞車架喇 ~~~~

7 點 17 分喇   仲塞緊   好在我地大把零食咋   唔係就餓壞了   呵呵

呢日未完架 ^^