雞絲炒油麵 + 腐乳西生菜 ( 12-NOV-2015 )

( 12-NOV-2015  THU )

今朝又係天陰陰   可唔可以唔好咁嘅天氣呀 ~~~~~~~~~~

同里奧大人一齊行嘅時候   好多時都會講下嘢   亂 up 廿七咁啦   講起佢平時喺屋企食嘢   食完唔執   當自己喺茶餐廳咁   之後我話呀   如果第時我唔同佢一齊   無人可以頂得佢順呀   佢話 sorry 呀   到時不知幾多人想同佢執嘢 @@   咁我再話   如果最後想我回心轉意   真係唔可以咁無手尾呀   知唔知呀   佢笑我痴痴地   哈 ~

晏晝去睇中醫   所以今朝要食飽 d   其實食到一半已經好鬼飽   我已經走包   所以見到 d 人可以食哂成個麵餐   加埋個包   我覺得佢地好勁   雖然我都有食力   但可能啱啱起身   無咩咁好胃口啦   不過如果假期瞓得夠   我都可以食哂一個餐   心情唔同   真係食量都唔同   哈哈 ~

菇場唔太忙   有 d 唔慣   因為我依家已經有一堆嘢 hold 住   唔想之後又一連衝鋒咁做做做呀   分散做好 d 咁囉 ~   

Lunch time 即飛去牛頭角睇中醫喇   等唔到巴士   好在原來有小巴到嘅   去到等咗 10 分鐘就到我喇   都好耐無睇醫師   估唔到佢認得我   仲話我肥咗添   哈哈   之後佢同我量血壓   問我係咪好緊張   因為血壓 135/80   我話梗係啦   趕頭趕命黎架   一陣仲要番工呢   又話我心火盛   我話呢排食牛肉   佢話唔好食咁多   好燥架喎   同埋我呢排唔知做咩   個咀會有 d 抽筋   雖然好輕微   但成日係咁都驚囉   驚中風呀   不過醫師叫我唔好咁緊張   放鬆 d 喎 ~         

睇完都已經 1 點 15 分   感恩有小巴到菇場   咁買埋麵包就跑番去喇 ~

好鬼攰呀   差唔多 2 點先食嘢 ~

大班呢隻 "肉鬆美奶軟包" 好好味   我鍾意食架   但覺得個名好肉酸   嘩哈哈哈

放工去拎中藥   去埋街市買餸就番屋企   唉   d 雨落得好密   希望一陣唔好落啦   我想去徑步呀 ~

里奧大人 6 點 45 分放工   諗住 7 點先煮   好在再認真 d 諗下一陣有咩煮咋   原來係要即刻煮   咁里奧大人一番黎就即刻有食得   因為我仲要淥烏冬   係星期日食剩架   唔食就要掉架喇 ~  

是日懶餐 - 雞絲炒油麵 + 腐乳西生菜  

雞絲炒油麵 - 其實我要清埋個紫洋蔥   所以先炒油麵   因為我實在唔想煎豬扒   哈   呢個炒油麵又方便   只需要 1 塊雞扒 + 1 斤油麵 + 1 個紫洋蔥 + 半個椰菜就搞掂   但因為我要食烏冬   咁無可能再食到油麵啦   食剩大半碟   咁唯有帶埋 lunch box 同聽晚食多餐囉 ~   

腐乳西生菜 - 想清埋 3 嚿腐乳   咁買份西生菜啦   仲有個留番聽晚 ~

搞掂哂都係 8 點幾   抖多陣   9 點去徑步   徑 30 分鐘   之後再去 Taste 買嘢   因為簽  Compass 買滿 $100 有 92 折   哈哈 ~

番到屋企都 10 點   沖埋涼就食生果   每人 2 個香梨   其實咁夜唔想食咁多水份嘅生果   但真係唔想擺咁耐   所以要食埋去囉 ~

睇多陣電視   11 點 45 分先瞓呀 ~