白切雞 + 蠔油燜節瓜 + 芫茜皮蛋魚片湯 ( 1-FEB-2015 禁 )

我用較剪剪   咁方便好多   最驚拎刀   廚房樣樣嘢都可以用完隔一陣先洗   但如果把刀呢   我就用完即洗   即放回原位   因為好驚跌落隻腳度呀 

媽咪整埋一樽薑蔥蓉比我   勁細心呀

( 1-FEB-2015  SUN )

今朝番主日學   所以 8 點半要起身食早餐 lu ~

終於食到芝士嘅鹹香味喇   我喺菇場附近嘅茶餐廳   d 芝士無味架

食完早餐就番屋企抖陣   之後就番教會   崇拜完畢都差唔多 1 點   咁我去街市買餸喇   呢個時候去街市係最好   無咩人   因為好多檔口都小休 ~

買下買下又好鬼重   所以番屋企喇 ~

2 點幾去食 tea   飲咗奶茶好精神   所以抖陣就滾湯   早 d 飲好 d 嘛   唔想半夜三更去廁所 ~

好啦   諗住整銀針粉   整咗 2 次衰咗   再冷靜一陣又再整   又連衰 2 次   成包澄麵比我整哂呀   好在 $7/包咋   不過唔會再整啦   太大打擊喇 ~

5 點幾飲埋湯就蒸雞喇   今晚去徑步   所以 7 點 15 分開飯喇 ~      

我依家係糙米溝白米   今晚試下唔落咁多水   點知有 d 硬   我無問題呀   但里奧大人話好硬   驚食到胃痛   所以我話煮個米粉佢食啦   佢係咁話唔好意思   哈 ~

是日晚餐 - 白切雞 + 蠔油燜節瓜 + 芫茜皮蛋魚片湯  

白切雞 - 媽咪尋晚蒸好比我   所以我翻蒸就得   勁方便 ~  

蠔油燜節瓜 - 呢個餸又係好易煮   同埋 lunch box 叮瓜好過叮菜   次次 d 菜都叮到好黃   好難食 ~

芫茜皮蛋魚片湯 - 要清清熱氣   咁滾呢個湯最好啦   我又鍾意食皮蛋 ~ 

搞掂哂就抖陣   同里奧大人 8 點一齊半出去徑步   徑咗半個鐘就番屋企喇   因為我想食生果 ~

沖埋涼就食生果   睇陣電視   11 點瞓 lu ~