衝瘋鴨仔團 @ 張家界美好回憶記錄 ( FEB 2015 )

今年我初五 ( 23/2 ) 就要開工喇   但里奧大人就初九 ( 27/2 ) 先開工   仲要講明呢日一定要番公司開年   所以又係有時間所限   唔可以去咁耐旅行喇 ~

依家番工真係覺得好攰   哈   所以我都好想新年去旅行 relax 一下囉 ~

時間所限只去東南亞   里奧大人唔想去泰國   我又唔想去台灣   咁諗住去韓國   不過個團唔多啱玩   我又唔想 plan   所以又去大陸囉   呵 ~

咁其實去大陸都 ok 嘅   因為我覺得 d 景真係好靚好靚   唔係親眼見到呢   真係好難形容   果種震撼真係好難用筆墨形容   但   我其實又真係好驚去大陸   春節期間實係好多人   景點更加唔駛講   但無計啦   張家界行程又幾吸引我地   所以就報團喇   原來報初三出發   不過最後唔成團   所以改為初二出發 lu ~

團友有 24 人   ( 1 家 5 口 + 1 家 4 口 ( 香港人 & 台灣人 )  + 1 家 3 口 + 2 對母子 ( 一對係香港人 & 一對係四川人 ) + 1 對夫婦 + 我同里奧大人   我地喺大陸坐架旅遊車真係非常之舒服   因為係由 51 座位改為 39 座位   唔怪得我咁好瞓啦   哈 ~

@ 旅遊車



今次主要旅程都係 "等 " 同 "坐"   因為春節期間   好似初一至初六   公路係唔收費   所以呢   d 人真係穿州過省架   沿途見到好多川 /鄂 / 贛 / 貴 / 滬嘅車牌   所以度度都係車   我地旅遊巴又大架   有 d 地方直頭唔比駛入去添架   但司機叔叔好好人   盡量會泊喺近我地嘅地方   唔駛我地行咁耐呢 ~

因為可以同 d 團友一齊傾計   傾下傾下架車又到 lu   每去一個景點   最小係 45 分鐘 ( 唔塞車 )   最耐係兩個鐘 ( 唔塞車 )   其實我係預咗要坐好耐車   不過無諗過真係咁耐   第 5 日由中午 1 點坐車   坐到夜晚 8 點 45 分   中途去咗 1 次廁所咋   但好感恩一件事係   司機叔叔搵到條新開嘅公路   不過就要走多 200 公里   佢話呢 200 公里嘅油錢由佢負責   但最緊要係會避開塞車   因為如果跟行程嘅路線   保守估計都可能要 12am 先落車   我地行新公路都有塞車架   好在都會行下停下   唔係就慘咯   今次架車行咗接近 1400 公里呀 ~

今次主要係去睇景   可惜無上到天子山   因為真係接受唔到同人身貼身迫住排隊   但都有其他地方係值得去嘅 ~

@ 龍王洞



@ 紅石林




@ 鳳凰古城



天氣方面   我覺得勁凍啦   最低得 6 度  最高好似得 12 度咋   我又無帶厚頸巾   只係帶咗條薄絲巾   因為我無諗過咁鬼凍呀   嗚   加上又陰陰天   感覺係寒上加寒   但就無落雨   只係 22/2 呢日落雨   所以我同里奧大人唔上天子山囉   其餘幾日天氣都係陰陰天   不過好多人話落雨嘅時候   影袁家界係最靚   但天氣變幻莫測嘛   導遊話佢同事喺佢地遲一個鐘到袁家界   大霧到咩都睇唔到呀 ~

食物方面   真係一般啦   發展中嘅地方嘛   唔好有要求   有得食已經好好架喇   基本上好多餸都係以菜為主   都好丫   清淡 d   其實正宗湖南菜係好辣好油   所以導遊次次喺我地用餐之前就打去飯店   要求 " 小辣小油 "   真係好細心   我真係好感恩好感恩呢團有個好好嘅導遊呢 ~

@ 野山菌湯

住宿方面   都 ok 啦   唔敢有要求   不過最尾住果間酒店就真係超正喇   夠乾淨同光猛 ~

@ 皇冠假日酒店 ( 長沙五星標準 )

團友方面   好感恩所有團友都好好呀   好似朋友一齊 join 埋一齊去旅行咁   同每個 party 都有傾有講   好開心呢   希望次次跟團 d 團友都係咁好玩啦   哈哈 ~

@ 我地圍埋一齊就會傾計   真係好開心

呢次旅程其實真係相當之攰   基本上日日都係 6 點 morning call   除咗最後果日係 7 點 morning call   咁好在坐嘅時間真係好多囉   可以瞓番夠本   哈哈 ~

我最深刻就係坐一程車要接近 8 個鐘   同埋就係 d 團友   包括我地自己   一上車就食零食   瞓醒就食嘢   食完又瞓   瞓完又食   可能天氣太凍   要熱量呀 ~

老實講   每個景點都要 一個鐘   咁梗係喺車瞓嘛   即係一醒就要落車食嘢   其實無咩胃口   加上 d 餸真係唔啱胃口囉   同埋天氣凍   d 餸又好快凍   我唔係咁想食   所以一上車就食番自己鍾意食嘅零食   里奧大人話零食變糧食   我帶咗好多好多零食架   有 4 包蟹餅 + 1 大包夾糖 + 1 大包軟糖 +  8 條魚肉腸 + 1 磅豬肉粒 + 2 包童星點心麵 + 10 包大發魷魚絲 + 半磅話梅薑   所以我成個背囊都係裝零食   錢唔跟身都唔緊要呀   最緊要有零食   唔係餓暈都似 ~

去大陸有樣好   就係無咩嘢買   今次買咗 2 盒黑茶同辣椒   民族手飾都無買   因為我一定要洗   但洗完實會甩色   咁就無哂意義咯 ~

@ 黑茶   RMB800 有兩盒   我地簽信用卡比錢   點知收到 statement 係接近 $1,100   唉   下次都係帶多 d 錢跟身好 d

       
@ 買 2 盒送呢個壺

蒜蓉辣醬同七星花剁椒   每樽 RMB10   曲奇餅 RMB38

薑糖   唔記得係 RMB30 定 RMB35/包

今次影咗差唔多 5000 張相   好似 17GB   如果上天子山   可能有 20GB   不過都係里奧大人影多啦   我又攰又凍   真係無咩 mood 影   好在里奧大人鍾意影相咋   唔係真係無得留念架喇   雖然酒店有 wifi 我都唔想上網打機呀   只係同家姐 whatsapp 幾句   問佢同媽咪有無嘢就唔傾喇   反而里奧大人就有同朋友呀屋企人 whatsapp   佢仲時不時 send 相比家姐睇   我話靠佢喇   哈哈 ~

雖然今次旅行真係好攰   同埋係去大陸玩   但我都好開心   因為我真係好鍾意睇 d 天然景呢 ~

團費 : HK$3,999 X 2
保險費 : HK$192 X 2
領隊導遊司機服務費 : HK$480 X 2
利是 :HK$300