蜜糖黑椒雞翼 + 唐生菜 ( 17-JUN-2014 )

( 17-JUN-2014  TUE )

出門口又落過雲雨   呢排又係唔帶遮唔得呢 ~

早餐食奶醬多   之後阿爽又黎埋   我錄咗德國 vs 葡萄牙   所以我一睇到新聞播體育消息   我就即刻聽歌   我唔想知賽果呀 ~

番到菇場   同事賓賓大大聲講賽果   整鬼佢丫   不過佢成日傾計都好大聲   驚無人知佢存左咁   好煩   同埋聽佢講嘢   一個話題講好耐   聽到我識背 ~

Lunch Time 同 8 卦出去食   熱鬼到呢   所以一開工   我同佢都好鬼眼瞓   哈 ~

同 PMS skype   佢問我覺唔覺渠王有口氣   我話我一早知啦   但我只係問 8 卦聞唔聞到咋   佢話聞到有小小口氣   不過我無問其他同事呀   我驚係得我一個聞到嘛   咁 PMS 都話佢都驚得佢一個聞到呀   咁即係渠王真係有口氣啦   仲要係好嚴重果隻   佢話有時渠王同佢講嘢   渠王好鍾意 "烘" 到好埋同人講嘢   所以佢要閉氣   之前我搭 lift   見到渠王 "烘" 埋同同事講嘢   個同事即刻縐哂眉頭   同事真係慘   晨早流流吸毒氣 ~

今日痴咗線   同 8 卦 skype 咗成日   打 keyboard 打到手指痛   不過佢難得 free 啦   阿頭仲係 off   20 號之後就要回復正常 lu ~

好焗呀   不過放工都要去買餸   買完真係成身汗呀   慘 ~          

醃好雞翼再浸埋菜就拖地喇   之後就煮飯   因為我要 9 點睇波 ~

里奧大人 7 點半放工   不過我都食先喇   好鬼熱呀   食完快快趣沖涼 ~   

是日懶餐 - 蜜糖黑椒雞翼 + 唐生菜  

蜜糖黑椒雞翼 - 本來諗住煮新嘢架   不過真係無咩時間   所以煮番舊嘢   哈哈 ~  

唐生菜 - 想食腐乳   所以煮唐生菜   浸又方便   煮又方便   真係唔錯 ~

叫里奧大人食完抖陣好沖涼   我要 9 點睇波呀   實在太開心   我最愛嘅德國隊贏咗   4 : 0   呵呵 ~

呢兩日瞓得唔係咁好   所以 11 點瞓喇 ~